تفاصيل يوم المقابلة للهجرة العشوائية فى السفارة - مقدم من الاستاذ George Ramzy

تفاصيل يوم المقابلة للهجرة العشوائية فى السفارة - مقدم من الاستاذ George Ramzy

أنا رحت السفارة الساعة 7:30 صباحا كان فيه طابورين اللى على اليمين طابور السياحة واللى على الشمال طابور الهجرة وقفت على الشمال لما قربنا على الباب قالولنا أى واحد معاه موبايل يقفله
واحنا داخلين فتشونا تفتيش دقيق وأخدوا الموبايلات المقفولة وفتشوا شنطة مراتى دخلوا الشنطة على مكنة تفتيش زى اللى فى المطارات وقلعت حزام البنطلون عشان أمر من البوابة

دخلنا وأخدت رقم واستنيت فى صالة انتظار حوالى ساعة لحد ما سمعت رقمى رحت للشباك رقم 14 لقيت واحدة مصرية طلبت منى الأوراق : وهى : شهادة التخرج , وشهادة الجيش وشهادات الميلاد لجميع أفراد الأسرة وقسيمة الجواز ( جميع الأوراق أصل وصورة وترجمة ) وظرف الكشف الطبى المغلق لكل فرد واديتنى ورقتين أدفع بيهم رسوم المقابلة ورسوم ال دى اتش ال رحت لشباك 4 ودفعت رسوم المقابلة 440 دولار للفرد الواحد ( وفعلا خبر تخفيض المقابلة من 819 دولار الى 440 دولار خبر صحيح 100% ) دفعت بالمصرى وحسبولى الدولار بـ 6 جنيه فقط رغم انه برة فى البنك سعره 6.05 جنيه وادانى وصل بالمبلغ ثم توجهت الى صالة الـ دى اتش ال ودفعت 105 جنيه ( 75 للفرد الأساسى + 10 جنيه لكل فرد اضافى ) وطلب منى مندوب ال دى اتش ال العنوان اللى عاوز استلم فيه التأشيرات وأرقام تليفوناتى وادانى وصل بالمبلغ ثم رجعت لصالة الانتظار وفضلت مستنى ساعة كمان لحد ماخلصوا لم كل أوراق المهاجرين والساعة 9 قالوا فى المايك نداء أخير على أى مهاجر متواجد داخل أو خارج الصالة ولم يسلم أوراقه يتوجه الى شباك 14 لتسليم أوراقه ولما انتهوا من استلام أوراق جميع المهاجرين بدأت المقابلات

سمعت رقمى حوالى الساعة 9:30 توجهت الى شباك 12 لمقابلة القنصل وكانت بنوتة أمريكية عسولة ومبتسمة دائما بعكس المصريين اللى هناك وكلمتنى بالعربى المكسر دون أن أطلب منها ذلك طلبت منى الوصلين اللى معايا ( بتوع رسم المقابلة والـ  دى اتش ال ) وسألتنى الأسئلة الآتية : ..  هل تقسم ان الكلام اللى فى الورق دا صحيح ؟ قلت أقسم ... هل سافرت الى أمريكا قبل كدة ؟ قلت لأ ... هل سافرت أى دولة برة مصر ؟ قلت لأ ... مين اللى انت كاتب اسمه وعنوانه فى امريكا ؟ قلت دا ابن عم والدتى ... تحب تغير العنوان وتروح لعنوان تانى فى أى ولاية ؟ قلت لأ نفس العنوان ... أصغر بناتك سنها كام سنة ؟ قلت 7 شهور ... انت بتشتغل ايه فى مصر ؟ مدرس رياضيات
وقالتلى امضى هنا بأسمك كاملا فى ورقك وورق بناتك .. وزوجتى مضت باسمها فى ورقها .. ثم طلبت منى ومن زوجتى أخذ البصمات بوضع اصابعنا على جهاز البصمة الالكترونى الموجود أمام الشباك ثم ابتسمت لنا وقالت مبروك
التأشيرات هاتجيلك على البيت  كمان اسبوعين .. ابتسمنا وقلنالها شكرا بس لى سؤال من فضلك ... قالت اسأل ... قلت لو أنا عاوز أغير عنوانى فى أمريكا وأنزل على أى ولاية تانية ينفع ... قالت براحتك بس الجرين كارد هانبعته على العنوان اللى مكتوب فى الورق 

خرجت وأخدت موبايلى من الأمن اللى على البوابة والحمد لله وعقبال الجميع